Astana, 26 sentyabr, AZƏRTAC

Qazaxıstanın paytaxtı Astanada keçirilən Azərbaycan Mədəniyyəti Günləri çərçivəsində sentyabrın 26-da mühüm tədbirlər keçirilib.

AZƏRTAC-ın məlumatına görə, Astananın Milli Muzeyində Qazaxıstan Milli İncəsənət Universitetinin tələbələri üçün Azərbaycan incəsənətinə dair silsilə mühazirələr təşkil edilib.

Tədbirdə Azərbaycanın tanınmış mədəniyyət xadimləri çıxış ediblər. Azərbaycan Milli İncəsənət Muzeyinin direktoru, Əməkdar mədəniyyət işçisi Şirin Məlikovanın “1920–1980-ci illərdə Azərbaycanda rəngkarlıq və qrafika”, Azərbaycan Mədəniyyət Nazirliyinin İncəsənət və qeyri-maddi mədəni irs şöbəsinin müdiri Sevil Kərimovanın “Təbriz miniatür məktəbi”, Azərbaycan Milli Xalça Muzeyinin direktoru, Əməkdar mədəniyyət işçisi Əminə Məlikovanın “Azərbaycan Milli Xalça Muzeyi: Müasir məkanda qədim incəsənət” mövzularında mühazirələri dinlənilib.

Bu tədbirlər Azərbaycan və Qazaxıstan arasında mədəni əlaqələrin möhkəmləndirilməsinə və Azərbaycan incəsənətinin tanıdılmasına xidmət edir.

Elşən Rüstəmov

AZƏRTAC-ın xüsusi müxbiri

Astana